ഇലിപ്പ ഔഷധഗുണങ്ങൾ

കേരളത്തിലെ വനങ്ങളിലും നാട്ടിൻപുറങ്ങളിലും സമൃദ്ധമായി വളരുന്ന ഒരു ഔഷധ വൃക്ഷമാണ് ഇലിപ്പ .ഇതിനെ ഇലുപ്പ,ഇരിപ്പ തുടങ്ങിയ പേരുകളിലും കേരളത്തിൽ ആറിയപ്പെടും .

Botanical name : Madhuca longifolia 

Family : Sapotaceae (mahua family)

Synonyms : Bassia latifolia , Illipe latifolia,  Madhuca indica,  Madhuca latifolia

ആവാസകേന്ദ്രം .

ഇന്ത്യ ,ശ്രീലങ്ക ,മ്യാന്മാർ എന്നിവിടങ്ങളിൽ കാണപ്പെടുന്ന വന്മരമാണ് ഇലിപ്പ. ഭാരതത്തിൽ ദക്ഷിണേന്ത്യയിലും  ,ബംഗാൾ ,ഗുജറാത്ത്  മഹാരാഷ്ട്ര എന്നിവിടങ്ങളിലുമാണ് ഇലിപ്പ കൂടുതലായും കാണപ്പെടുന്നത് . കേരളത്തിലെ നിത്യഹരിത വനങ്ങളിലും നാട്ടിൻപുറങ്ങളിലും ഇലിപ്പ  കാണപ്പെടുന്നു . രേവതി നാളുകാരുടെ ജന്മനക്ഷത്ര വൃക്ഷമാണ് ഇലിപ്പ. ഇന്ന് വംശനാശം വന്നുകൊണ്ടിരിക്കുന്ന ഒരു വൃക്ഷംകൂടിയാണ് ഇലിപ്പ .

രൂപവിവരണം .

20 മീറ്റർ ഉയരത്തിൽ വളരുന്ന ഒരു മരമാണ് ഇലിപ്പ . ധാരാളം ശാഖകളും ഉപശാഖകളും ഉണ്ടാകും . മരത്തിന്റെ തൊലിക്ക് മങ്ങിയ തവിട്ടുനിറമാണ് . തൊലിക്ക് നല്ല മിനുസവുമുണ്ടാകും . ഇതിന്റെ ഇലകൾ ശാഖാഗ്രത്തിൽ കൂട്ടമായി കാണപ്പെടുന്നു . ഇതിന്റെ ഇലകൾ കട്ടിയുള്ളതും തടിച്ച സിരകളോടു കൂടിയതുമാണ് .

ഇതിന്റെ തളിരിലയ്ക്ക് തവിട്ടുനിറമാണ് . ഇലകളിൽ വെളുത്ത നിറത്തിലുള്ള കറയുണ്ട് . ഇലിപ്പയുടെ തടിക്ക് ചുവപ്പുനിറമാണ് .

പൂക്കാലം .

ഡിസംബർ -മാർച്ച് മാസങ്ങളിലാണ് ഇലിപ്പ പൂക്കുന്നത് . പൂക്കൾ കൂട്ടമായി കാണപ്പെടുന്നു . പൂക്കൾക്ക് മഞ്ഞകലർന്ന വെള്ളനിറമാണ് . ഇവയുടെ മാംസളമായ പൂക്കൾക്ക് നല്ല മധുരമുണ്ടാകും . ഇവയുടെ പൂക്കൾ രാത്രിയിൽ വിരിഞ്ഞ് അടുത്ത ദിവസം തന്നെ പൊഴിഞ്ഞു പോകും . രോമം കൊണ്ടു പൊതിഞ്ഞ ഇവയുടെ പൂമൊട്ടുകൾക്ക് തവിട്ടുനിറമാണ് . വേനൽക്കാലത്താണ് ഇവയുടെ ഫലങ്ങൾ വിളയുന്നത് .ഇതിന്റെ ഫലത്തിൽ ഒന്നോ ,രണ്ടോ വിത്തുകൾ കാണപ്പെടുന്നു . ഇതിന്റെ വിത്തിൽ എണ്ണ അടങ്ങിയിട്ടുണ്ട് .

രാസഘടകങ്ങൾ .

ഇലിപ്പയുടെ പുഷ്പ്പത്തിൽ പഞ്ചസാര ,പൊട്ടാഷ് ,ആൽബുമിനോയ്ഡുകൾ , ജലം എന്നിവ അടങ്ങിയിരിക്കുന്നു .ഇലിപ്പയുടെ വിത്തിൽ 50 % വരെ സ്ഥിരതൈലവും ,സ്റ്റെറോൾ ഗ്ലുക്കോസൈഡും , കൊഴുപ്പും ,അന്നജവും ,അടങ്ങിയിരിക്കുന്നു .കൂടാതെ കാർബോഹൈഡ്രേറ്റ് ,നാര് ,പ്രോട്ടീൻ എന്നിവയും ഓർഗാനിക് അമ്ലം ,അൽക്കലോയിഡുകൾ എന്നിവ കുറഞ്ഞ മാത്രയിലും അടങ്ങിയിരിക്കുന്നു . ഇവയുടെ വിത്തിൽ നിന്നും എണ്ണ ആട്ടിയെടുക്കുന്നു .

ഇലിപ്പ വിവിധ ഭാഷകളിലെ പേരുകൾ .

Common name : Honey tree, Indian Butter Tree.

Malayalam : Ilupa, Irippa , Njannal

Tamil :  Kattiruppai , Illupei

Telugu : Ippa , Madhukamu

Kannada :  ippe

Bengali : Mahuya

Gujarati : Mahudo

Marathi :  mhomva , moha

Hindi : Gilaunda, Gulu, Mahua, Vanprasth

Sanskri t: Madhuca, Madhucam, Moha, Vānaprasthh

ഇലിപ്പയുടെ ഉപയോഗങ്ങൾ .

ഇലിപ്പയുടെ തടിക്ക് വെള്ളയും കാതലുമുണ്ട് ,കാതലിനു ഇരുണ്ട ചുവപ്പുനിറമാണ് , നല്ല ഈടും ബലവുമുള്ള തടിയാണ് ഇലിപ്പയുടെ. അതിനാൽ ഫർണീച്ചർ നിർമ്മാണത്തിനും മറ്റും ഉപയോഗിക്കാവുന്നതാണ് . പണ്ടുകാലത്ത് ക്ഷേത്രങ്ങളുടെ വാതിലുകൾ ,രഥങ്ങൾ എന്നിവ ഇലിപ്പയുടെ തടി ഉപയോഗിച്ചാണ് നിർമ്മിച്ചിരുന്നത് , അതുപോലെ പണ്ടുകാലത്ത് ക്ഷേത്രങ്ങളുടെ പരിസരത്ത് ഈ വൃക്ഷം നട്ടുവളർത്തിയിരുന്നു .

കൂടാതെ ഇലിപ്പ പ്രസിദ്ധമായ ഒരു ഔഷധം കൂടിയാണ് .മരത്തിന്റെ തൊലി ,പൂവ് ,കായ ,വിത്ത് എന്നിവ ഔഷധങ്ങൾക്ക് ഉപയോഗിക്കുന്നു .ഇലിപ്പയുടെ പൂവ് മദ്യമുണ്ടാക്കാനും ഉപയോഗിക്കുന്നുണ്ട് . 

പണ്ടുകാലത്ത് ഇലിപ്പയുടെ പൂവ് ഉണക്കി പാകപ്പെടുത്തി ശർക്കരയ്ക്ക് പകരമായി ഉപയോഗിച്ചിരുന്നു  . വിത്തിൽ നിന്നും ആട്ടിയെടുക്കുന്ന എണ്ണ സോപ്പുണ്ടാക്കാനും ,വിളക്ക് കത്തിക്കാനും ഉപയോഗിക്കുന്നു . കൂടാതെ ഈ എണ്ണ ഭക്ഷ്യയോഗ്യമാണ് . ഇലിപ്പയുടെ എണ്ണയ്ക്ക് നല്ല മഞ്ഞ നിറമാണ് . ഇലിപ്പയുടെ കുരു ആട്ടിയെടുത്ത ശേഷം കിട്ടുന്ന പിണ്ണാക്കിനും ഔഷധഗുണങ്ങളുണ്ട് .  സോപ്പ് ഉപയോഗത്തിൽ വരുന്നതിന് മുമ്പ് സോപ്പിനു പകരമായി ഈ പിണ്ണാക്കാണ് കുളിക്കാൻ ഉപയോഗിച്ചിരുന്നത് .

രസാദിഗുണങ്ങൾ.

രസം : മധുരം , കഷായം

ഗുണം : ഗുരു, സ്നിഗ്ധം

വീര്യം : ശീതം

വിപാകം : മധുരം

ഔഷധയോഗ്യ ഭാഗം .

പുഷ്പ്പം , ഫലം ,ഇല ,തൊലി ,വിത്ത് ,വിത്തിൽ നിന്നും എടുക്കുന്ന എണ്ണ .

ഇലിപ്പയുടെ ഔഷധഗുണങ്ങൾ .

വാതപിത്ത രോഗങ്ങൾ ശമിപ്പിക്കുന്നു . ദാഹം ,ജ്വരം ഇവ കുറയ്ക്കുന്നു .പ്രസവശേഷം സ്ത്രീകളിലെ മുലപ്പാൽ വർദ്ധിപ്പിക്കുന്നു . ലൈംഗീകശക്തി വർദ്ധിപ്പിക്കുന്നു . വിത്തിൽ നിന്നും ആട്ടിയെടുക്കുന്ന എണ്ണ വാതരോഗങ്ങൾ,ചർമ്മരോഗങ്ങൾ എന്നിവ  ശമിപ്പിക്കുന്നു .മധുകാസവം ,മാനസമിത്ര വടകം ,അഹിഫേനാസവം , ത്രിഫലഘൃതം , ഏലാദി ചൂർണ്ണം ,അഭയാരിഷ്ടം തുടങ്ങിയ ആയുർവേദ ഔഷധങ്ങളിലെ ഒരു പ്രധാന  ചേരുവയാണ് ഇലിപ്പ .

ചില ഔഷധപ്രയോഗങ്ങൾ .

വാതരോഗം .

ഇലിപ്പയുടെ വിത്തിൽനിന്നും ആട്ടിയെടുക്കുന്ന എണ്ണ പുറമെ പുരട്ടിയാൽ വാതരോഗങ്ങൾ ശമിക്കും .

ലൈംഗികശക്തി ,ശരീരശക്തി.

ഇലിപ്പയുടെ പൂവും അതിന്റെ നാലിരട്ടി പാലും നാലിരട്ടി വെള്ളവും  ചേർത്ത്  കാച്ചി വെള്ളം വറ്റുമ്പോൾ ഇറക്കി 200 മില്ലി വീതം പഞ്ചസാരയും ചേർത്ത് പതിവായി കഴിച്ചാൽ ലൈംഗികശക്തി ,ശരീരശക്തി എന്നിവ വർദ്ധിക്കും . പ്രസവശേഷം സ്ത്രീകളുടെ മുലപ്പാൽ വർദ്ധിപ്പിക്കാനും നന്ന് .

ഇലിപ്പയുടെ പൂവ് കുപ്പികളിലാക്കി  നിരക്കെ ചെറുതേൻ ഒഴിച്ച് 41 ദിവസം നെല്ലിൽ കുഴിച്ചിട്ട് 41 ദിവസത്തിന് ശേഷം പിഴിഞ്ഞരിച്ച് ഓരോ സ്പൂൺ വീതം ദിവസവും രാവിലെ വെറുവയറ്റിൽ കഴിച്ചാൽ നഷ്ടപ്പെട്ടുപോയ ലൈംഗീകശേഷി തിരിച്ചുകിട്ടും .

ശീഘ്രസ്കലനം .

ഇലിപ്പയുടെ പൂവ് ഒരു ഗ്ലാസ്  പാലിൽ തിളപ്പിച്ച് പഞ്ചസാരയും ചേർത്ത് കിടക്കാൻ നേരം കഴിച്ചാൽ ശീഘ്രസ്കലനം ഉണ്ടാകുകയില്ല . ബീജങ്ങളുടെ എണ്ണം വർദ്ധിപ്പിക്കാനും നന്ന് .

ശരീരവേദന മാറാൻ  .

ഇലിപ്പയുടെ വിത്തിൽനിന്നും ആട്ടിയെടുക്കുന്ന എണ്ണ പുറമെ പുരട്ടിയാൽ ശരീരവേദന മാറും .

മുഖക്കുരു മാറാൻ .

ഇലിപ്പയുടെ കുരു ആട്ടിയെടുത്ത ശേഷം കിട്ടുന്ന പിണ്ണാക്ക് വെള്ളത്തിൽ ചാലിച്ച് പതിവായി മുഖത്തുപുരട്ടിയാൽ മുഖക്കുരു മാറും .

ചൊറി മാറാൻ .

ഇലിപ്പയുടെ തൊലി അരച്ച് പുറമെ പുരട്ടിയാൽ ചൊറി മാറും .കുട്ടികളെ തേച്ചു കുളിപ്പിച്ചാൽ കുട്ടികൾക്കുണ്ടാകുന്ന ചൊറി മാറും .

ചുമ മാറാൻ .

ഇലിപ്പയുടെ പൂവ് കഷായം  ഉണ്ടാക്കി കഴിച്ചാൽ ചുമ മാറും .

തലവേദന മാറാൻ .

ഇലിപ്പയുടെ കുരു ആട്ടിയെടുത്ത എണ്ണ തലയിൽ തേച്ചാൽ തലവേദന ശമിക്കും . ഇലിപ്പ പിണ്ണാക്ക് ഉണങ്ങി  പൊടിച്ച്‌  മൂക്കിപ്പൊടി  പോലെ വലിച്ചാലും  തലവേദന മാറും.

ശരീരക്ഷീണം മാറാൻ .

ഇലിപ്പയുടെ ഇല ഇട്ടു തിളപ്പിച്ച വെള്ളത്തിൽ കുളിച്ചാൽ ശരീരക്ഷീണം മാറും .

അപസ്മാരം .

ഇലിപ്പയുടെ കാതൽ,  തിപ്പലി, വയമ്പ്, മുളക്, ഇവ സമം അരച്ച് ഇന്തുപ്പു ചേർത്ത് ചൂടുവെള്ളത്തിൽ കലക്കി നസ്യം  ചെയ്താൽ അപസ്മാരം, ഉൻമാദം, സന്നിപാതം എന്നിവ മാറും. Buy Madhuca longifolia Healthy Live Plant