ലൈംഗീക ശേഷിക്കുറവ് ,ബീജങ്ങളുടെ എണ്ണക്കുറവ് ,വെള്ളപോക്ക് , ശ്വാസകോശരോഗങ്ങൾ ,ത്വക്ക് രോഗങ്ങൾ മുതലായവയുടെ ചികിൽത്സയിൽ ആയുർവേദത്തിൽ പരാമർശിച്ചിട്ടുള്ള ഒരു ഔഷധസസ്യമാണ് നിലപ്പന .ഇ ഇതിനെ നെൽപ്പന , കറുത്ത മുസ്ലി എന്നീ പേരുകളിലും അറിയപ്പെടും .സംസ്‌കൃതത്തിൽ താലമൂലി എന്നും ഹിന്ദിയിൽ മുസ്ലി എന്ന പേരിലും അറിയപ്പെടുന്നു .ഇവ കൂടാതെ താലമൂലിക ,താലപത്രികാ ,ഭൂതാലി ,ഹംസപദി ,ദീർഘകന്ദികാ തുടങ്ങിയ സംസ്‌കൃത നാമങ്ങളും ഈ സസ്യത്തിനുണ്ട് .
Botanical Name : Curculigo Orchioides
Family : Hypoxidaceae (Star Grass Family)
Synonyms : Hypoxis Orchioides,curculigo Ensifolia, Curculigo Brevifolia
കാണപ്പെടുന്ന സ്ഥലങ്ങൾ .
ഇന്ത്യയിലുടനീളം കാടുകളിലും പറമ്പുകളിലും വെളിമ്പ്രദേശങ്ങളിലും നിലപ്പന കാണപ്പെടുന്നു .
സസ്യവിവരണം .
പനയുടെ ഇലകളോട് സാദൃശ്യമുള്ള ചെറിയ സസ്യം .ഇലകൾക്ക് 15 -45 സെ.മി നീളവും 1 .3 -2 .5 സെ.മി വീതിയുമുണ്ട് .ഇലകൾ റോസെറ്റാകൃതിയിൽ വിന്യസിച്ചിരിക്കുന്നു .ഇലകൾ മിക്കപ്പോഴും തറയിൽ തൊട്ടുകിടക്കും .ഇതിന്റെ കിഴങ്ങുപോലെയുള്ള മൂലകാണ്ഡം മണ്ണിനടിയിൽ വളർന്നു കൊണ്ടേയിരിക്കും .പൂക്കൾ ഇലകളുടെ കക്ഷങ്ങളിൽ ഉണ്ടാകുന്നു .പൂക്കൾക്ക് തെളിഞ്ഞ മഞ്ഞനിറമാണ് .ഇവയുടെ ഫലം 1 .2 സെ.മി നീളമുള്ള കാപ്സ്യൂൾ .ഇതിനുള്ളിൽ ഒന്നു മുതൽ നാലു വരെ കറുത്ത തിളങ്ങുന്ന വിത്തുകൾ കാണപ്പെടുന്നു .
രാസഘടകങ്ങൾ .
നിലപ്പനയുടെ കിഴങ്ങിൽ റെസിൻ ,ടാനിൻ ,സ്റ്റാർച്ച് ,കാൽസിയം ഓക്സലേറ്റ് എന്നിവ അടങ്ങിയിരിക്കുന്നു .
നിലപ്പനയുടെ ഔഷധഗുണങ്ങൾ .
ദശപുഷ്പങ്ങളിൽ ഉൾപ്പെടുന്ന ഒരു സസ്യമാണ് നിലപ്പന .ഉപയോഗത്തെ ആധാരമാക്കി ഈ സസ്യത്തെ വാജീകരണ ഔഷധമായി ആയുർവേദം കണക്കാക്കുന്നു .പുരുഷന്മാരുടെ ലൈംഗീക ശേഷിക്കുറവ് പരിഹരിക്കും .സ്ത്രീകൾക്കും പുരുഷന്മാർക്കും ഉണ്ടാകുന്ന മൂത്രച്ചുടിച്ചിൽ ശമിപ്പിക്കും .സ്ത്രീകളിലെ വെള്ളപോക്ക് ശമിപ്പിക്കും .രക്തം ശുദ്ധീകരിക്കും .കൂടാതെ ചർമ്മരോഗങ്ങൾ ,മഞ്ഞപ്പിത്തം ,ചുമ ,ആസ്മ ,ബ്രോങ്കൈറ്റിസ് ,പനി ,വയറിളക്കം ,വായുകോപം ,ദഹനക്കേട് ,അരുചി , നേത്രരോഗങ്ങൾ ,നടുവേദന ,നീര് എന്നിവയ്‌ക്കെല്ലാം നിലപ്പന ഔഷധമായി ഉപയോഗിക്കുന്നു .
ഉണങ്ങിയ നിലപ്പനക്കിഴങ്ങിന്റെ ആരോഗ്യഗുണങ്ങൾ .
രക്തസമ്മർദം കുറയ്ക്കാൻ സഹായിക്കുന്നു .ബീജങ്ങളുടെ എണ്ണം വർധിപ്പിക്കാൻ സഹായിക്കുന്നു .ടെസ്റ്റോസ്റ്റിറോൺ അളവ് വർധിപ്പിക്കാൻ സഹായിക്കുന്നു .എല്ലുകളുടെയും പേശികളുടെയും ബലം വർധിപ്പിക്കാൻ സഹായിക്കുന്നു .ചുമ ,ആസ്മ ,ജലദോഷം എന്നിവ ശമിപ്പിക്കുന്നു .പ്രമേഹം കുറയ്ക്കാൻ സഹായിക്കുന്നു .പൈൽസിനെ സുഖപ്പെടുത്തുന്നു.ചൊറിച്ചിലും മറ്റു ത്വക്ക് രോഗങ്ങളും ശമിപ്പിക്കുന്നു .ശരീരഭാരം വർദ്ധിപ്പിക്കാൻ സഹായിക്കുന്നു .
പ്രാദേശിക നാമങ്ങൾ .
English Name - Black Musli
Malayalam Name - Nilappana
Tamil Name - Nilappanaikilangu
Telugu Name - Nelatadai
Kannada Name - Neladali, Nelatenga
Hindi Name – Kalimusali
Gujarati Name - Kalimusali
Marathi Name - Kalimurali
Bengali Name - Sadamurali
Punjabi Name - Syahoomusali
Oriya Name - Musali, Talamuli
ഔഷധയോഗ്യഭാഗം - മൂലകാണ്ഡം .
രസാദിഗുണങ്ങൾ .
രസം :മധുരം,തിക്തം
ഗുണം :ഗുരു
വീര്യം :ശീതം
വിപാകം :മധുരം
നിലപ്പന ചേരുവയുള്ള ചില ആയുർവേദ ഔഷധങ്ങൾ .
മുസലീഖദിരാദി കഷായം - Musalikhadiradi kashayam.
സ്ത്രീകളിലെ വെള്ളപോക്ക് ,അമിത ആർത്തവം എന്നിവയുടെ ചികിൽത്സയിൽ ഉപയോഗിക്കുന്ന ഒരു ഔഷധമാണ് മുസലീഖദിരാദി കഷായം.
അശ്വഗന്ധാഅരിഷ്ടം - Ashwagandharishtam.
ലൈംഗീക പ്രശ്നങ്ങൾ ,മാനസിക പിരിമുറുക്കം ,വിഷാദരോഗം മുതലായവയുടെ ചികിൽത്സയിൽ അശ്വഗന്ധാഅരിഷ്ടം ഉപയോഗിക്കുന്നു .
ദശമൂലാരിഷ്ടം -Dasamularishtam .
ദഹനസംബന്ധമായ പ്രശ്നങ്ങൾ ,പനി ,ചുമ ,ജലദോഷം ,കഫക്കെട്ട് എന്നിവയുടെ ചികിൽത്സയിലും പ്രസവാനന്തര ക്ഷീണം അകറ്റാനും ദശമൂലാരിഷ്ടം ഉപയോഗിച്ചു വരുന്നു .
വിദാര്യാദി ലേഹ്യം-Vidaryadi Leham.
പേശിക്ഷയം ,ശരീരവേദന ,വയറുവീർപ്പ് ,ഗ്യാസ്ട്രബിൾ ,ആസ്മ ,ശരീരക്ഷീണം ,പോഷകാഹാരക്കുറവ്,ഉറക്കക്കുറവ് മുതലായവയുടെ ചികിൽത്സയിലും ശരീരഭാരം വർധിപ്പിക്കുന്നതിനും ,ലൈംഗീകശേഷി വർധിപ്പിക്കുന്നതിനും വിദാര്യാദി ലേഹ്യം ഉപയോഗിക്കുന്നു .കൂടാതെ പൈൽസ് ,ഹൃദയ സംബന്ധമായ രോഗങ്ങൾ മുതലായവയുടെ ചികിൽത്സയിലും വിദാര്യാദി ലേഹ്യം ഉപയോഗിക്കുന്നു .
Ashwamed Capsule.
ലൈംഗീകശേഷിക്കുറവ് ,ഉദ്ധാരണക്കുറവ് ,ശീഘ്രസ്കലനം മുതലായവയുടെ ചികിൽത്സയിൽ ഈ ഔഷധം ഉപയോഗിക്കുന്നു .
Somna Tablets.
ലൈംഗീകശേഷിക്കുറവ്,ഉത്ക്കണ്ഠ ,മാനസിക പിരിമുറുക്കം ,ഉറക്കക്കുറവ് ,ഓർമ്മക്കുറവ് മുതലായവയുടെ ചികിൽത്സയിൽ ഈ ഔഷധം ഉപയോഗിക്കുന്നു .
Rathi Capsule.
പുരുഷന്മാരിലെ ലൈംഗീകശക്തി വർധിപ്പിക്കുന്നതിനുള്ള ഒരു ആയുർവേദ ഔഷധമാണ് രതി കാപ്സ്യൂൾ.
നിലപ്പനയുടെ ചില ഔഷധപ്രയോഗങ്ങൾ .
നിലപ്പനക്കിഴങ്ങ് ഉണക്കിപ്പൊടിച്ച് 3 മുതൽ 6 ഗ്രാം വരെ തേനിൽ ചേർത്തോ പാലിൽ കലക്കിയോ രാവിലെയും വൈകിട്ടും ദിവസം രണ്ടുനേരം എന്ന കണക്കിൽ കഴിച്ചാൽ പുരുഷന്മാരിലെ ലൈംഗീകശക്തി വർധിക്കും .കൂടാതെ സ്ത്രീകൾക്കുണ്ടാകുന്ന വെള്ളപോക്ക് ,സ്ത്രീകൾക്കും പുരുഷന്മാർക്കും ഉണ്ടാകുന്ന മൂത്രച്ചൂടിച്ചിൽ എന്നിവയും മാറിക്കിട്ടും .
ശതാവരിക്കിഴങ്ങും ,നിലപ്പനക്കിഴങ്ങും ഒരേ അളവിൽ അരച്ച് പാലിൽ ചേർത്ത് കഴിച്ചാൽ സ്ത്രീകളിലെ വെള്ളപോക്ക് മാറിക്കിട്ടും .കൂടാതെ നിലപ്പനക്കിഴങ്ങും ഞവരയരിയും കൂട്ടിച്ചേർത്ത് കഴിക്കുന്നതും വെള്ളപോക്കിന് ഔഷധമാണ് .നിലപ്പന സമൂലം ഇടിച്ചു പിഴിഞ്ഞ നീര് കഴിക്കുന്നത് ആർത്തവ സംബന്ധമായ എല്ലാ രോഗങ്ങൾക്കും നല്ലതാണ് .
നിലപ്പനക്കിഴങ്ങ് പച്ചയ്ക്ക് അരച്ച് 3 മുതൽ 6 ഗ്രാം വരെ പാലിൽ കലക്കി ദിവസം രണ്ടുനേരം എന്ന കണക്കിൽ ഒരാഴ്ച്ച പതിവായി കഴിച്ചാൽ മഞ്ഞപ്പിത്തം ശമിക്കും .
നിലപ്പനക്കിഴങ്ങ് അരച്ച് ആട്ടിൻപാലും തേനും ചേർത്ത് ചാലിച്ച് പുറമെ പുരട്ടിയാൽ ചർമ്മത്തിന്റെ നിറം വർധിക്കും .നിലപ്പനക്കിഴങ്ങ് അരച്ച് പുറമെ പുരട്ടുന്നത് എല്ലാവിധ ചർമ്മരോഗങ്ങൾക്കും നല്ലതാണ് .
നിലപ്പനക്കിഴങ്ങ് ഉണങ്ങി കത്തിച്ച് പുക ശ്വസിക്കുന്നത് ചുമ ,കഫക്കെട്ട് ,ശ്വാസതടസ്സം എന്നിവയ്ക്ക് ആശ്വാസം കിട്ടും .നിലപ്പനയുടെ ഇലകൊണ്ടു കഷായമുണ്ടാക്കി കഴിച്ചാൽ ചുമ മാറും .
നിലപ്പനയുടെ ഇല വേപ്പെണ്ണയും ചേർത്ത് അരച്ചു പുറമെ പുരട്ടിയാൽ ശരീരത്തിലുണ്ടാകുന്ന നീരും വേദനയും മാറിക്കിട്ടും .
നിലപ്പനയുടെ ഇല താരന് മരുന്നാണ് .നിലപ്പനയുടെ ഇല അരച്ച് തലയിൽ തേച്ചുകുളിച്ചാൽ താരൻ മാറിക്കിട്ടും .
നിലപ്പനക്കിഴങ്ങ് ഉണങ്ങിപ്പൊടിച്ച്‌ 5 ഗ്രാം വീതം പാലിൽ ചേർത്ത് പഞ്ചസാരയും ചേർത്ത് പതിവായി കഴിച്ചാൽ ശരീരം തടിക്കും .